వచ్చేసాడు సూరీడు ...

                       కమ్ముకున్న చీకటి వైపు 
                  కన్ను ఎర్ర చేస్తూ 
                  వచ్చేస్తున్నాడు సూరీడు ... 

                  మబ్బుల మాయలను 
                  మంటల వేడిలో మసి చేస్తూ 
                  వచ్చేస్తున్నాడు సూరీడు ... 

                  కారు మేఘాలు, మెరుపు తీగలూ 
                  అడ్డు తప్పుకోండి ... 

                  తూర్పును వేదించే రేయిని 
                  వెలుగులకు దూరంగా వెంట తరుముతూ 
                  వచ్చేసాడు సూరీడు ... 

                  నింగి కళ్ళకు గంతెలు తీస్తూ 
                  వెలుగుల వర్షం కురిపిస్తూ 
                  వచ్చేసాడు మండే మార్తాండుడు .... 

                  కన్నీటి అలలూ, చేదు కలలూ 
                  చివరి కోరికలు చెప్పుకోండి ....  

తెలియకున్నాను సఖి.... !

నెలవంకతో స్నేహంకోరి,
నీలి మేఘాలు నడిచి వస్తే
తారలన్నీ అసూయతో
తొంగి చూసాయి ...

ఇంటికి రమ్మంటూ
చీకటి మబ్బులు
వెండి వెలుగులకు కబురు చేస్తే
వెలుగులన్నీ నావేనంటూ
జాబిల్లి కళ్ళు చిలిపి చేసాయి ....

మాయలో ముంచిన
మంత్రమేమో చెలి నీవు ...
నిన్ను చూడగా అందరూ ఊరుకున్నారు ...

వెన్నలవో వర్శానివో
మనసును తడిపే తోలి చినుకువో
నా కవితలకు  గమ్యానివో
తెలియకున్నాను సఖి.... !

దేశ గీతం ...

లే... లేచి నిలబడు సోదరా  

దేశానికి  గెలుపు ఉంది

అడ్డు నీకు ఏముంది?...లే...

కాదు నువ్వు... కాదు నువ్వు..

సోమరితనపు సోగ్గాడు

ఓటమిని ఓర్చేవాడు...కాదు నువ్వు

కాదు నిజం...కాదు నిజం

పొరుగు దేశం గొప్పది

ఈ దేశం మార్పు లేనిది...కాదు నిజం

అడగబోకు  నువ్వు  అడగబోకు

అందరూ తప్పే, నేనైతే తప్పా 

ఒక్కనితో వచ్చేది మార్పా?...అడగబోకు

విడువబోకు నువ్వు విడువబోకు

ఒంటరివైనా పట్టుదలను విడువబోకు

నిన్ను నీవే అడగాలి మరువబోకు

లేచి నిలబడు సోదరా

దేశానికి గెలుపు ఉంది..!

కన్నీరెందుకే దీపమా ...?

కన్నీరెందుకే దీపమా ...?

కాలుతూ వెలుగులు పంచేవు 

వెలుగు-నీడల నడుమ కరిగిపోయేవు ... 

కాళ్ళు తడిసేలా కన్నీరెందుకే దీపమా ...?

నీలాకాశంలోని అంతులేని మౌనం  

మాటరాని మనసులోని ముగిసిపోని భావం 

నీ కళ్ళలొ దాగి ఉంది 

కన్నీటిలొ తడిసిపోతూ ఉంది ...!

కాలే హృదయం, కరిగే దేహం

మండే మనసుల వేదన 

కవి కల్పన దాకా బాదను పంచుతూ ఉంది 

ఓదార్పుకై నీవాడిగా నేనున్నా 

కన్నీరు ఆపుకోవే దీపమా .... !

మారరా ఓ మనిషి !

జంతువైనా జీవమున్నదే 

నీ ప్రాణమల్లే విలువైనదే  

పలకలేదు పాపం 

బుద్ధి-హీనత విధాత ఇచ్చిన శాపం 

తెలుసుకోరా మనిషి 

ఏ దేవుడికి ఈ నైవేద్యం ?

పొట్ట నింపడమే నీ గుడ్డి గమ్యం 

మారరా ఓ మనిషి 

చావు కేక ఎంత ఘోరం !

అయినా కరగదు; బండరాయి నీ హృదయం 

నువ్వు మారవురా మనిషి ... 

గూటికి వెళ్ళవే చిలుకా... !

పొద్దు వాలిపోయే, 

పడవ వెళ్ళిపోయే, 

పండుకోసం వెతికేవే చిలుక !

గూటికి వెళ్ళకా ...  

పొరుగూరి చిలుకలు ఎగిరిపోయే,

పువ్వులో నవ్వులు ఎండిపోయే,

పైరగాలిలో పరుగులు తీసేవే చిలుక !

గూటికి వెళ్లకా...  

పున్నమి-రోజు కాకపోయే, 

పండువెన్నెల లేకపోయే, 

పైకి చూస్తూ ఎవరిని వెతికేవే చిలుక !

గూటికి వెళ్ళకా ... 

పెదవిపైన మాటలన్నీ ఎండిపోయే, 

మనసుల నడుమ దూరం పెరిగిపోయే, 

పంతమెందుకే గోరింకతో చిలుక !

గూటికి వెళ్ళకా ... 

మత మాంద్యం!!

అమ్మ కడుపులో పంచుకున్న 

నెత్తురికి లేదు మతం ... 

ఆగసం దాటి నడిచొచ్చిన 

వర్షానికి లేదు మతం ... 

ఆకలి తీర్చే అన్నానికి లేదు మతం 

ఊహను దాటించే కలలకు లేదు మతం ... 

ఎక్కడిది ఈ మతం ?

మతం అంటే 

రొమ్ములో దమ్ములు కన్ను తెరిచేనేల ?

కులం అంటే 

నెత్తురులో పంతము పొటెత్తునేల ?

అన్నలూ, వేమన్నలూ చెప్పినా నమ్మవేల !!!

మతానికి దేవుళ్ళు దారి చూపారా ?

ఆచారంతో కులాల కడుపు-నింపుతున్నారా?

ఎవరు సృష్టించారు మతం ?

మనుజ మతం, విశ్వ మతం అని చాటి చెప్పరా సొదరా...